BUTUAN CITY- Mingsaka na sa 13 ang ihap sa mga namatay tungod sa dengue samtang mikabat na sa 1,529 ang kinatibuk-ang kaso sa maong sakit nga natala sa lalawigan sa Albay.
Sa exclusive interview sa Bombo Radyo Legazpi kangi Provincial Health Office Sanitary Engineer ug Consultant Engr. William Sabater, gibutyag niining nga kadaghanan sa mga namatay mga bata nga kritikal na ang kondisyon sa dihang nadala sa mga ospital.
Gipasiugda usab sa opisyal nga kinahanglan mas hugot ang pagmonitor sa mga pasyente ilabina kung mawala na ang hilanat, tungod kay niini nga yugto kasagarang mogawas ang mga komplikasyon sa dengue.
Gi-awhag usab ang publiko nga mokonsulta dayon sa doktor kung makasinati og taas nga hilanat sulod sa duha hangtod pito ka adlaw, pangluya, kasakit sa ilawom sa mga mata, ug pagpakita og mga pantal sa lawas. Naggahin na usab ang Albay Provincial Health Office og libre nga dengue test kits nga mahimong makuha sa mga health center sa tibuok lalawigan.
Sigon pa ni Sabater, posible usab nga ideklararng State of Calamity ang Albay aron magamit sa lokal nga kagamhanan ang calamity fund alang sa gikinahanglang mga lakang sa mga barangay.
Samtang padayon usab ang Dengue Information Caravan sa Provincial Health Office sa nagkalain-laing lungsod aron hatagan og hustong impormasyon ang mga residente bahin sa paglikay ug pagpugong sa pagkaylap sa dengue.
