BUTUAN CITY- Nagpadala si Pope Leo XIV og inisyal nga emergency aid nga nagkantidad og €100,000 o dul-an sa $114,000 aron matabangan ang mga biktima sa sunod-sunod nga kusog nga mga linog sa Venezuela.
Sumala sa Vatican, ang pondo magikan sa Apostolic Almonry ug gamiton alang sa nagpadayon nga relief ug rescue operations sa mga apektadong komunidad. Sa inisyal nga taho sa mga awtoridad, mikabat na sa labing menos 164 ang namatay human sa magnitude 7.2 ug 7.5 nga mga linog, samtang padayon pa ang pagpangita sa mga posible pang naluwas ug ang pagtimbang sa kadaot sa imprastraktura ug panginabuhian.
Gawas sa Vatican, mipahayag usab og suporta ug tabang ang Cuba, Iran, Italy, Estados Unidos, ug European Union aron makatabang sa mga biktima sa maong kalamidad.
