BUTUAN CITY – All-set na si Pinay tennis ace Alex Eala alang sa BNP Paribas Open nga magsugod karong adlawa, Miyerkules Marso 4 sa Indian Wells ilabina nga nakasugod na siya og bansay ka-uban si Laura Siegemund sa Germany.
Gitrabaho ni Eala ang iyang forehand ug backhand, lakip na ang iyang serves nga kasagaran ginatan-aw nga usa sa iyang kahuyangon isip usa ka netter.
Hinay-hinay na usab nga nag-improve ang iyang serves, nga makita sa mga service aces nga iyang narekord sa mga mi-aging torneo nga iyang giapilan.
Aduna pa siyay pipila ka adlaw nga pahulay sa dili pa mudula sa Indian Wells tungod kay nakadawat siya og opening-round bye. Gawas sa mga Grand Slam events, ang Indian Wells usa sa pinakadakong torneo sa WTA Tour, diin obligado nga mutambong ang mga top players sa kalibotan sama nila Aryna Sabalenka (world No. 1) sa Belarus, Iga Swiatek (No. 2) sa Poland, Elena Rybakina (No. 3) sa Kazakhstan, Coco Gauff (No. 4) sa Amerika, Jessica Pegula (No. 5) sa Amerika, Amanda Anisimova (No. 5) sa Amerika, Jasmine Paolini (No. 7) sa Italy, ug defending champion nga si Mirra Andreeva sa Russia.
Target ni Eala nga maka-abante sa mosunod nga mga round sa Indian Wells aron mas mapataas pa ang iyang ranggo sa WTA. Karon, anaa siya sa No. 31 — ang iyang bag-ong career-high ranking.
Kung makaabot si Eala sa quarterfinals, posible nga masulod niya ang Top 20 ranking.
