BUTUAN CITY -Nagpahimangno ang Department of Health (DOH) sa publiko nga gamiton ang PhilHealth outpatient dental benefits nga nagkantidad og ₱1,000 matag miyembro ilalom sa primary care package.
Ang benepisyo naglakip og duha ka dental cleaning kada tuig, check-up, fluoride application para sa mga bata ug hamtong, ug preventive sealants sa molars aron malikayan ang kadaot sa ngipon.
Sigon ni DOH Usec. Emmie Liza Perez-Chiong, ang dental check-up buhaton kaduha sa usa ka tuig, ug mas kanunay alang sa mga pasyente nga dali makapundar og plaque.
Gi-awhag usab ang mga ginikanan nga dalhon ang ilang mga anak sa dentista sa dihang magsugod na sila og ngipon, aron ma-instilar ang maayong batasan sa oral health gikan sa pagkabata. Gipahimangno usab sa DOH nga ang preventive dental care mas barato ug mas sayon kaysa pag-atubang sa komplikado ug mahal nga dental problems.
Sa pagkakaron, nagpadayon ang PhilHealth sa pag-accredit sa mga dentista nga modawat og pasyente ilalom sa dental package, samtang giatubang usab ang kakulang sa dentista sa nasud.
