BUTUAN CITY – Naggahin og usa ka building sa Democrito O Plaza Memorial Hospital ang Agusan del Sur Provincial Health Office aron mapalig-on ang ilang medical response alang sa Palarong Pambansa 2026 aron magsilbing special medical facility alang lamang sa mga medical emergency panahon sa nationwide sporting event.
Kompleto kini sa mga kahimanan sama sa x-ray, CT scan, laboratory services alang sa blood examination, mga tambal ug duna usa’y andam na nga ambulansya.
Sigon ni Dr Kenneth Sagrado, officer-in-charge sa maong ospital, tumong sa maong pasilidad nga dili masagol sa regular nga mga pasyente ang mga atletang magkinahanglan sa ilang medical services ug magsilbi na usab nga fast-lane alang sa mga delegado.
Dugang ni Dr Sagrado, kung kinahanglan og mas taas nga level sa pagtambal, mahimong ma-refer ang mga pasyente ngadto sa San Francisco Doctor’s Hospital ug uban pang mga medical facilities sa mga siyudad sa Butuan, Tagum ug Davao.
Usa sa natambalan sa maong pasilidad ang swimming technical official sa Region 2 kinsa gisakitan og tiyan.
Sigon sa iyang ka-uban nga si Virgil Reyes, paspas ug organisado ang pagresponde sa medical team bisan sa pag-abot pa lang nila sa pasilidad hangtud nga nasayran nga tungod kini sa appendicitis dayong dayeg sa ka-andam sa mga medical staff pagresponde sa mu-abot kanilang pasyente.
Gawas niini, duna usa’y on-site treatment area sulod mismo sa provincial government center nga duna’y gi-coordinate nga mga nurses ug doktor sa matag-playing venue aron paspas ang paghatag og first aid sa manignahanglan unya nga mga delegado.
