BUTUAN CITY- Giklaro sa Department of Migrant Workers kon DMW nga ang tanang 38 ka Overseas Filipino Workers kon OFWs nga sakay sa MV Hondius kansa gi-ingog naigo sa hantavirus nagpabiling negative ug walay sintomas sa maong virus.
Sumala ni DMW Secretary Hans Leo Cacdac atol sa press briefing niadtong Dominggo, Mayo 24, adlaw‑adlaw nga gi‑test ang mga OFW ug hangtod karon wala’y natala nga kaso. Sa grupo, 21 ka hotel workers ang gi‑quarantine sa Amsterdam, samtang 17 pa, lakip ang 14 ka deck ug engine crew ug 3 ka hotel workers, gi‑quarantine sa Rotterdam. Gipasabot ni Cacdac nga gimonitor sa Dutch authorities ang kahimtang sa mga OFW ug padayon nga gibayran ang ilang suweldo, diin 80 porsyento niini gi‑remit sa ilang mga pamilya sa Pilipinas. Ang quarantine period molungtad hangtod Hunyo 18, ug ang Department of Health ang magbuot kung kinahanglan pa ba og dugang quarantine sa ilang pag‑uli.
Ang MV Hondius, usa ka polar expedition cruise ship nga gipanag‑iyahan sa Oceanwide Expeditions, mi‑dock sa Rotterdam human sa biyahe gikan Argentina, Spain ug Cape Verde. Ang hantavirus, nga naggikan sa mga ilaga, usa ka talagsaon nga sakit nga walay bakuna ug espesipikong tambal.
