BUTUAN CITY – Dismayado matud pa si Pangulong Ferdinand Marcos Jr. human mapakyas sa pagpabalik sa Pilipinas ang Kanhe Ako Bicol party-list Rep. Zaldy Co sumala sa Malacañang.
Sigon ni Palace Press Officer Atty. Claire Castro nga personal niyang naka-estorya ang Pangulo ug giangkon niining “disappointed” siya tungod kay hapit na unta matuman ang repatriation ni Co.
Bisan paman, wala kini nahinayon tungod sa mga nagtunhay nga proseso sa ubang nasud nga nalambigit sa kaso.
Sumala sa Palasyo, migawas nga ang nahimong isyu dunay kalambigitan sa paggamit sa matud pa invalid documentation rasong ang Czech Republic pa gihapon ang dunay hurisdiksyon sa mga musunod nga lakang mahitungod sa kaso ni Co.
Gitin-aw usab sa Malacañang nga wala kini nakitang rason aron mangayo og pasaylo ang Pangulo sa publiko, bisan paman sa pagkadismaya sa ubang katawhan sa wala nahinayon nga pagpauli sa kanhe kongresista.
Pamugos ni Castro, gihimo sa administrasyon ang tanang angayang lakang aron maproseso ang kaso.
Gibarugan usab sa Palasyo nga walay sayop sa nahimong pamahayag sa Pangulo mahitungod sa pagkasikop kang Co sa Prague.
Naglaum usab ang gobyerno nga pinaagi sa mas lapad nga kooperasyon sa mga nasud sa ilalom sa United Nations Convention Against Corruption (UNCAC), mas mapadali ang proseso para sa posibleng pagbalik sa Pilipinas sa kanhe kongresista, nga nag-atubang sa mga kasong may kalabutan sa korapsyon sa flood control projects.
