BUTUAN CITY – Gikondena ug gikasuko sa Alliance of Concerned Teachers kon ACT ang pagsikop sa kapulisan og militar kang Rosanilla ‘Lai’ Consad, ang assistant school principal sa San Vicente National High School ning siyudad sa Butuan tungod kay hinimo-himo lamang matud pa, ug sayop usab ang mga alegasyong gibato kaniya ilabina ang pagpasaka nila og kasong attempted homicide.
Sa eksklusibong pakighinabi sa Bombo Radyo Butuan, gipadayag ni ACT Rep. France Castro nga gihimo kini sa mga otoridad human gibasura sa korte ang una na nilang gipasakang kasong malicious mischief ug kidnapping batuk kang titser Lai tungod sa kawala’y napresentang lig-ong ebidensya ang mga nag-akusa kaniya.
Kataw-anan matud pa ang gipasakang kaso sa kapulisan ug militar tungod kay sa panahong ilang gitumbok nga ang ilang ka-ubanang maestra maoy mitiro sa gika-ingong sundalo ug CAFGU member ning mi-aging tuig, kamulo si Consad ug trabaho alang sa blended-learning sa mga kabataan.
Ang gihimo matud pa sa mga otoridad ngadto sa magtutudlo kinsa mao ang ACT-Caraga regional secretary general, usa ka klarong harassment, pagpanghadlok ug tinguhang bungkagon ang ilang unyon taliwa nga rehistrado kini sukad pa niadtong tuig 2012.
Aminado si Rep. Castro nga tuig 2018 pa, gi-apil na sa militar si titser Lai sa mga membro sa kahugpungan nga gi-red ug terror tag kansa kabahin matud pa sa grand design sa administrasyon aron patak-umon ang ba-ba sa mga nakigbisog alang sa kaayuhan sa kinabag-ang katawhan.
Una nang gipadayag sa Police Regional Office kon PRO-13 atol sa pagpresenta nila kagahapon kang Consad sa media nga igo lang silang nagpatuman sa arrest warrant ug bahala na sila magpamatuod sa korte nga dili sila guilty sa maongakusasyon.
