BUTUAN CITY – Mipasalig ang Agusan del Norte Police Provincial Office nga wala’y matigayong white washing sa imbestigasyon sa duha ka mga sakop sa Philippine National Police kon PNP Maritime-Butuan City/Agusan del Norte kinsa nakapusil-patay sa mananagat nga si Ikiel Kintana sa Purok 1 West, Brgy. Calibunan, Cabadbaran City.
Kini ang gipadayag ni PCol. Martin Gamba, provincial director sa Agusan del Norte Police Provincial Office human ang insidenteng gilambigitan sa iyang mga sakop nga sila Police Senior Master Sergeant (PSMS) Rizyl Torricer ug Patrolman Ariel Jay Panes kinsa anaa na sa kostudiya sa Cabadbaran City Police Station.
Sa eksklusibong pakighinabi sa Bombo Radyo Butuan, gipadayag ni Col. Gamba nga i-evaluate pa sa City Prosecutor’s Office ang kasong murder nga gipasaka sa Cabadbaran City Police Station batuk sa duha ka mga pulis.
Samtang mamahimo matud pang pasakaan usab og kasong administratibo depende sa sirkumstansya, ang duha sama sa illegal discharge of firearms ilabina nga wala matud pa magpakita og pagsukol ang unom ka mga mangingisda gawas lang sa gipadayag sa mga nagpahigayon og seaborne patrol nga misulay matud pa sila pagsibat rason nga gipasalbahan apan na-igo si Kintanar nga miresulta sa iyang kamatayon.
Nagpahigayon na matud pa og re-enactment ang kapulisan sa Cabadbaran City uban ang taga-Scene of the Crime Operatives kon SOCO aron masubay ang dagan sa panghitabo.
Madumdumang sa eksklusibong pakighinabi usab ning sibyahan kang Norvin Cuevas, ka-ubanang mangingisda sa gipusil-patay nga si Ikiel ug operator sa fishing boat nga ilang gisakyan, gipadayag niining wala sila gipasalbahan sa taga-PNP Maritime kondili gipangti-unan gyod ug armas samang gisita dayong pabuto rason sa pagka-igo ni Kintanar.
Dinhi na matud pa natagak, ang katunga sa lawas ni Ikiel human na-igo sa dughan rason nga dali niya kining gi-agak.
Wala matud pa nanumbaling ang namusil nga mga sakop sa PNP Maritime dihang nagpatabang sila nga dalhon sa ospital ang biktima rason nga dali na usab niyang gipa-andar ang gipalong na niyang bangkang panagatan, padulong na sa baybay apan wala na kini naka-abot pang buhi sa ospital.
