BUTUAN CITY – Gipahunong una sa Department of Agriculture ang pag-angkat og five-percent broken imported rice.
Kini aron mahatagan og dalan ang pagtanom sa mga Pilipinong mag-uuma sa palay ug pagpangandam sa ani sa Setyembre.
Sigon ni Agriculture Secretary Francisco Tiu Laurel Jr., dili nila gustong mautro ang pagbagsak sa presyo sa palay sa walo hangtud sa 12 pesos kada kilo niadtong 2025 wet harvest season.
Pinaagi sa temporary import ban sa premium imported rice, mahimong patas ang dula sa lokal nga palay sa merkado.
Bugtong tugutan lang nga angkatong bugas ang 25 percent o sobra pa sa broken imported rice.
Sa datos sa DA, muabot sa 2.5 million metric tons sa imported rice ang moabot sa nasud karung tuiga, mas taas sa 2.29 million metric tons sa susamang panahon niadtong nakalabay nga tuig.
