BUTUAN CITY – Suportado sa Federation of Free Workers ang lakang sa House of Representatives nga usbawan og 150-pisos ang daily minimum wage sa mga trabahante sa pribadong sektor.
Kini human unang gi-aprubahan sa Senado ang sugyot nga 100-pisos nga across the board wage increase sa susamang sektor.
Sa eksklusibong pakighinabi sa Bombo Radyo Butuan, gipadayag ni Federation of Free Workers President Sonny Matula nga nagkahi-usa ang tanang national labor groups nga suportahan ang gi-asdang nga proposed wage increase ni Trade Union Congress of the Philippines kon TUCP Rep. Raymond Democrito Mendoza.
Kampante silang mapapasar kini sa unang kwarter ning tuiga human ang hearing kagahapon nga naghisgot sa mga wage house proposals nga pending karon sa House of Representatives.
Gila-uman matud pa nila nga sa Mayo uno atol sa Labor Day, ma-anunsyo na ang maong wage increase.
Giklaro pa ni Matula nga ang gisuportahan nilang 150-pisos nga usbaw sa suhulan kaya sa mga negosyante ug mga employers kansa moderate lang matud pa kung ikumpara sa 750-pisos nga lisod abagahon ilabina sa mga gagmay’ng negosyo.
Kini 21-porsiento lang matud pa sa kasamtangang suhulan sa Metro Manila kansa layo sa 40-porsientong across the board wage increase nga gipatuman niadtong tuig 1989 kondiin nasuta nga wala’y mga kompanyang nagsira o kaha natangtang sa ilang trabaho niadtong panahuna.
