BUTUAN CITY – Nasikop sa hini-usang pwersa sa kapulisan ug kasundaluhan atol sa gilusad nga law enforcement operation sa Tandag City, Surigao del Sur, ang nag-unang Most Wanted Person nga gikutay sa pagpatay kang Patrolman Jennis Mark Encinas.
Gi-ila ni Police Regional Office kon PRO-13 Director BGen Romeo Caramat Jr. ang suspek nga si Renie Boy Quezada alyas“Eboy”, 48-anyos ug membro sa nagkahuyang na nga Guerilla Front Committee 30, Northeastern Mindanao Regional Committee.
Gisikop sa ginsakpan sa Tandag City Police Station uban sa 36th Infantry Battalion, Philippine Army sa iyang panimalay sa Sitio Banahaw, Brgy. Maitom, Tandag City pasado alas-12:30 kaganinang hapon.
Gibase ang operasyon sa warrant of arrest nga gi-isyu sa 11th Judicial Region, Regional Trial Court, Branch 40, nga nakabase sa Tandag City, tungod sa kasong multiple attempted murder nga duna’y girekomendang pyansa balor 120-mil pesos alang sa iyang temporaryong kagawasan.
Madumdumang napatay si Pat Encinas atol sa engkwentro tali sa mga operating troops sa Surigao del Norte Provincial Mobile Force Company ug sa Communist Terrorist Group sa bukirang bahin sa Brgy. Buenavista, Tandag City niadtong Septembro 28, 2020.
Si alyas “Eboy”, nalistang number 1 most wanted person sa Tandag City, kinsa mao ang ikatulong suspek nga naaresto sa mga otoridad human ang pagkasikop sa mag-live in partners nga sila Ramel Aguire ug Jenelyn Abao sa Tandag City niadtong Marso 3 ning tuiga tungod sa susamang kaso.
