BUTUAN CITY – Gipamugos ni National Bureau of Investigation (NBI) Director Melvin Matibag nga nagpabiling balido o adunay bisa ang warrant of arrest sa International Criminal Court batok kang Senador Ronald dela Rosa bisan pag adunay pending nga petisyon sa Korte Suprema sa Pilipinas aron pugngan ang maong warrant.
Sumala ni Matibag, naminaw sila sa Korte Suprema apan klaro matud pa nga aduna gihapoy bisa ang ICC warrant nga una nang gikompirma sa publiko niaging semana.
Misulay ang National Bureau of Investigation o NBI sa pagpatuman sa warrant niadtong Mayo 11 apan gibutang sa Senado si dela Rosa sa “protective custody,” rasong miatras ang ahensya tungod kay ilang gitahod ang maong sitwasyon.
Samtang, gibutyag sa Department of the Interior and Local Government o DILG nga naghulat kini sa desisyon sa Korte Suprema sa dili pa molihok may kalabutan sa warrant.
Giisip matud pa sa ICC si Ronald dela Rosa isip “co-perpetrator” sa war on drugs ni kanhi Presidente Rodrigo Duterte nga sumala panakamatay og liboan ka mga indibidwal.
Nagsumite usab ang kampo sa senador og daghang urgent motion sa Korte Suprema lakip na ang pagpahunong sa implementasyon sa ICC warrant.
