BUTUAN CITY – Anaa na sa mga kamot sa Agusan del Sur Police Provincial Office ang na-missing nga Tagbina, Surigao del Sur Vice Mayor Antonio ‘Tony’ Adlao ug padayon pa ang gihimong interogasyon aron masuta ang tinuod nga nahitabo ug kung kinsa ang responsable sa iyang pagkawala.
Madumdumang una nang gipanghimakak ni Ka Sandara Sidlakan, nagpa-ilang tigpamaba sa rebeldeng New People’s Army kon NPA-Surigao del Sur ang pasangil sa pamilya Adlao nga sila ang midagit niini gumikan sa wala matud pa mahatag nga gipangayo nilang permit to campaign fee.
Sa eksklusibong pakighinabi sa Bombo Radyo Butuan, gipadayag ni Ka Sandara nga drama lang sa pamilya Adlao ang gihimo ilabina nga nagsugod na ang local campaign period.
Migawas matud pa sa ilang pakisusi nga maayo ang nahimutangan karon sa besi-mayor ug kanunay pa kining naglulinghayaw ug posibleng ang ilang drama, gituyo aron ipasumangil matud pa ngadto sa iyang ka-atbang sa pulitika apil na ngadto sa ilang grupo.
Gani, gilakbitan pa ni Ka Sandara nga posibleng atua pa kini nagpa-uraray sa laing mga bukton.
Gidugang pa ni Ka Sandara nga wala’y rason aron ila kining dagiton ug dala-dalahon sa bukid ilabina nga hinay na matud pa kining mulakaw.
