BUTUAN CITY – Nakasinati og yellow alert sa supply sa kuryente kagahapong adlawa ang Mindanao grid gikan sa alas-10 sa buntag ngadto na sa alas-kwatro sa hapon.
Sa eksklusibong pakighinabi sa Bombo Radyo Butuan, gipadayag ni Kristoffer Abellanosa, ang regional communications and public affairs officer sa National Grid Corporation of the Philippines kon NGCP-Mindanao, kini tungod kay duna may 673.98-megawatts sa grid ang dili available kagahapong adlawa.
Gibutyag sa opisyal nga gikan sa available nga kuryente sa parte sa Mindanao grid nga 2,761-megawatt, mi-abot lang sa 2,640-megawatts ang nagamit.
Nabantayan ang yellow alert tungod kay ang ilang operating margin, dili pa igo alang sa contingency requirement sa Mindanao grid.
Nakasamot pa niini ang siyam nila ka mga planta nga nakasinati og forced outage karong bulana gawas pa sa laing lima nga nag-operate nga underrated ang kapasidad.
Aminado ang opisyal nga tungod gihapon kini sa epektong hatud sa El Niño phenomenon rason nga halos tanang planta na sa tibuok Pilipinas ang dili na kayang makahatag sa demand sa kuryente sa mga kunsumidor.
Apan giklaro sa opisyal nga normal ang operasyon sa ilang transmission lines ingon man mga sub-station facilities tungod kay wala sila’y tower nga natumba.
