BUTUAN CITY – Gihatagan og arrival honors sa ginsakpan sa Philippine Coast Guard ang abo ni Cadet 4th Class Jonash Bondoc nga gisulod na sa urn human nahidangat kagahapon alas-singko sa hapon sa may Bancasi Airport.
Sa exclusive video nga nakuha sa Bombo Radyo Butuan, gipasibaw sa mga higala ug kabanay sa kadete ang ilang panawagan ngadto sa mga hingtungdang ahensya sa gobyerno nga hatagan og hustisya ang iyang nadangatan.
Atol kini sa hamubo nga programang gihimo sa bisinidad sa maong tugpahanan dihang nahidangat ang urn niini nga gibitbit sa iyang inahan.
Madumdumang napalgan na lang nga wala na’y panimuot ang biktima sulod sa pansayan sa usa sa mga barracks sa Philippine Merchant Marine Academy ug dihang gidala na sa San Marcelino District Hospital, gideklara kining dead on arrival.
Gisugat usab sa iyang mga classmates sa high school ug mga kahigalaan kinsa nagbitbit og mga plackards nga nangayo og hustisya sa nadangatan niini.
Gisinggit nila ang hustisya alang sa kamatayon ni Bondoc kinsa gisumbag matud pa sa Butuanon gihapong si Cadet 3rd Class Jomel Gloria diha sa dughan niini.
