BUTUAN CITY – Giklaro ni Reynaldo Deita, chairman sa Libertad White Transport Cooperative kon LWTC, nga kadto lang mga membro sa transport cooperatives ning siyudad sa Butuan nga duna’y prangkisa ang makadawat sa fuel subsidy nga ihatag sa lokal nga kagamhanan nga balor og 2-mil pisos.
Kini human nga nakadawat na usab sila sa 5-mil pisos nga ayuda gikan sa nasudnong kagamhanan pinaagi sa Department of Social Welfare and Development kon DSWD.
Sa eksklusibong pakighinabi sa Bombo Radyo Butuan, gipadayag sa opisyal nga sa ilang kooperatiba, duna sila’y 89 ka mga membro wala pa’y labot sa lima ka membro nga duna’y individual franchise.
Gipasabot sa opisyal nga kung apilon sa city government paghatag sa maong fuel subsidy ang mga membro nga wala’y prangkisa, makapa-aghat kini sa uban nga dili na mu-renew sa ilang prangkisa tungod kay mabati man nila nga susama ra nga benepisyo ang ilang madawat.
Apan giklaro ni Deita nga dili pa kini final tungod kay ila pang gipa-abot ang advisory gikan sa city government kalabot niini.
Hinuon daan na matud pa niyang gipasabot sukad sa iyang paglingkod nga kung duna’y ayuda ang lokal nga kagamhanan, ang makadawat niini kadto lamang duna’y prangkisa.
