BUTUAN CITY – Gihagit sa Presidential Anti-Organized Crime Commission (PAOCC) ang mga lokal nga kagamhanan partikular ang mga alkalde nga motabang sa pagsumpo sa mga ilegal nga Philippine Offshore Gaming Operators (POGOs) nga gitawag niining scam farms.
Sigon ni PAOCC spokesperson Winston Casio, kinahanglan sa Department of the Interior and Local Government (DILG) nga tawagon ang atensiyon sa tanang local chief executives diin nakabase ang nasangpit nga mga scam farms.
Dili matud pa malimod ang existence o pagtunhay sa nasangpit nga mga ilegal nga POGO.
Gibatikos usab sa opisyal ang Pagcor sa kawalay monitoring sa mga POGO ug gipamugos nga dili matapos ang responsibilidad sa gaming regulator sa oras nga nakansela na ang permit sa POGO.
Gihimo sa opisyal ang pamahayag human sa taho sa PAGCOR nga anaa sa 250 ka POGO ang nag-operate sa nasud nga walay tukmang lisensiya ug posibleng nalambigit sa mga nagkadaiyang krimen.
