BUTUAN CITY – Bastante ang suplay sa bugas sa siyudad sa Butuan.
Kini ang gipaneguro ni Butuan City Agriculture and Veterinary Department Head Engr. Pierre Anthony D. Joven sa pakighinabi sa Bombo Radyo Butuan.
Sigon ni Engr. Joven nga igo pa ang suplay sa bugas sa siyudad sulod sa 3 ka bulan.
Kini ilabina kay ning mga panahona, 90 porsiento na ang naka-harvest sa humay diin sa 7,000 ka ektaryas nga palayan anaa sa 6,500 ka ektarya na ang na-ani.
Gibutyag pa sa opisyal nga makatiyam-tiyam karun ang mga mag-uuma sa humay tungod kay taas ang farm gate price nga anaa sa 23 pesos ngadto sa 25 pesos.
Gipa-ambit pa ni Engr. Joven nga naghatag ang City Government og certification ngadto sa mga mag-uuma aron ekonsidera sila sa mga gasoline station nga magpatubil og daghan alang sa ilang mga makinaryas sama sa combine harvester.
Gikumpirma usab sa opisyal nga ning semanaha lang nakapagawas na ang Department of Agriculture pinaagi sa ilang opisina sa fuel subsidy nga nadawat sa 169 ka mga mag-uuma.
Tag-3-mil pesos ang nadawat sa mga benipisyaryo nga gisulod sa ilang claim card. Pagklaro sa opisyal nga ang daan pa kining fuel subsidiya o kadtong wala nahatagan niadtong 2025.
Samtang muabot sa 794 ka mag-uuma ang nahatagan sa Philippine Crop Insurance Corporation kon PCIC og assistance nga miabot sa 4.7 milyones pesos sa katibuk-an.
Malaumon usab ang opisyal nga sunod semana mahatagan usab og tabang ang 5,347 ka mag-uuma sa humay og mais nga makadawat og tag-2,300 pesos matag-usa og muabot sa 10.7 milyones pesos sa katibuk-an gikan sa nasyunal nga kagamhanan.
