BUTUAN CITY – Gelayong nakigpulong si Butuan City Mayor Law Fortun aron mahatagan og aksiyon ang pagkahubas sa tubig sa Taguibo River nga maoy usa sa mga nag-unang gikuhaan og suplay.
Sa nahimong pulong kauban ang nagkalain-laing ahensya ug mga barangay nga maapektuhan, gipasabot sa Taguibo Aquatech Solutions Corporation (TASC) nga gikan sa 58 million liters per day (MLD) niadtong Abril 16, 2026 niubos na kini sa 35 MLD sa Abril 20, 2026 diin paspas ang paghubas sa tubig.
Sumala sa TASC nga kung magpadayon ang kainit sa panahon ug walay mga pag-ulan, mosamot ang paghubas sa catchment area sa umaabot nga bulan sa Mayo og naapektuhan ang produksiyon ug distribution sa suplay sa tubig sa 19 ka barangay.
Isip tubag, gipa-andar matud pa sa Butuan City Water District ang tulo ka pump stations sa mga strategic nga lugar samtang andam usab ang mga water tankers gikan sa mga partner agencies aron magamit kung ugaling himuon ang water rationing.
Dugang pa sa mayor, nga nangandam na usab ang City Government of Butuan sa pagpatuman sa mga contingency measures aron malikayan ang mas grabe nga epekto kung mosamot ang sitwasyon ug ang pag-explore usab sa mga uban pa nga source sa tubig..
Sa pagkakaron, andam usab ang syudad nga motabang sa Butuan City Water District (BCWD) pinaagi sa pag-augment sa equipment ug uban pang mga gikinahanglan aron madugangan ang suplay sa tubig.
Gitan-aw usab ang posibilidad sa water distribution sa mga barangay aron masiguro nga patas ug organisado ang pag-apod-apod sa tubig.
Sa kinatibuk-an, ang mga gihimo nga aksyon nagtinguha nga abunuhan ang suplay sa tubig alang sa katawhan hilabina ning panahon sa grabeng kainit. Giawhag ang katawhan sa padayon nga pagpondo og tubig sa mga panimalay.
