BUTUAN CITY – Midaghan ang mga pamilya sa Pilipinas nga nagbutyag nga sila pobre ug nakunhuran usab ang nag-ingong dili sila kabus, sumala sa pinakabag-ong survey.
Misaka sa 52% ang self-rated poverty niadtong Marso 2026 gikan sa 51% niadtong Nobyembre 2025.
Ang gitawag nga self-rated poverty mao ang kaugalingong pagtan-aw sa mga pamilya kung kabus ba sila o dili.
Bugti kini sa 14.5 milyones ka pobre nga pamilya, mas taas kumpara sa 14.3 milyones niadtong Nobyembre.
Dunay 13% sa mga pamilya ang nagbutyag nga hapit na sila mahulog sa kakabos samtang 35% ang nagbutyag nga dili sila pobre.
Misaka ang national score tungod kay midaghan ang mga nag-ingon nga sila pobre sa Visayas ug Metro Manila samtang mikunhod usab ang self-rated poverty sa Mindanao ug Balance Luzon.
Ang pinakataas nga self-rated poverty anaa sa Visayas nga adunay 66%, mas taas og walo ka puntos gikan sa 58% niadtong Nobyembre.
Misaka usab sa 42% gikan sa 37% ang porsyento sa mga taga-Metro Manila nga nagsulti nga sila pobre.
Nagpabiling taas ang Mindanao sa 63%, bisan og mas ubos kini kumpara sa 65% niadtong Nobyembre samtang halos wala’y kausaban sa Balance Luzon nga 44% gikan sa 45%.
