BUTUAN CITY – Na-intercept sa hini-usang pwersa sa militar ug kapulisan pasado alas-12:30 kagahapon sa hapon didto sa Brgy. Poblacion 2, lungsod sa Santiago, Agusan del Norte ang duha ka mga motorsikong kargado og mga eksplosibo ug mga supply sa pagkaon alang sa rebeldeng grupong New People’s Army kon NPA.
Sigon ni Police Regional Office kon PRO-13 Director BGen. Romeo Caramat Jr., ang dukha ka motorsiklo, gimanehuan nila Darnel Jaudian, 24-anyos ug Raymund Tanghal, 24-anyos, pulos residente sa Brgy. Telesfora, Tubay, Agusan del Norte.
Nakumpiska gikan sa ilang mga karga ang usa ka pipe bomb-type Improvised Explosive Device, 15-metros nga detonating cord, duha ka magazines sa 5.56mm ngaduna’y lima ka mga buhing bala, 33 ka rounds sa caliber 5.56 live ammunition, ug nagkada-iyang mga food supplies.
Base sa intelligence report, ihatud unta kini ngadto sa mga membro sa Guerrilla Front (GF)16, Northeastern Mindanao Regional Committee ilawom sa kadumalahan ni Rolando Leyson, Jr. kon Ka-Edroy.
Alang matud pa unta kini sa ilang ika-[52 nga anibersaryo niadtong Marso 29 apan nalangay tungod sa gipahugtang security measures ug law enforcement operations sa tibuok rehiyon.
Gidala na ang mga naaresto ug ang mga nakumpiskang butang ngadto sa Santiago Municipal Police Station samtang gi-andam ang tukmang kasong ipasaka batuk kanila.
