BUTUAN CITY – Gipatawag usab sa Philippine National Police-Criminal Investigation and Detection Group (PNP-CIDG) si business leader Manny Pangilinan isip kabahin sa imbestigasyon sa kontrobersyal nga pagkamatay sa duha ka Ateneo de Manila University basketball players nga sila si AgSurnon Rene Clert Baterbonia ug Nigerian Divine Adili.
Sumala ni Interior Secretary Jonvic Remulla, hapit na mahuman ang imbestigasyon ug gila-uman nga mapasaka na ang mga reklamo ngadto sa Department of Justice ugmang adlawa Biyernes.
Apil usab sa gipatawag ang pipila ka opisyal sa Ateneo de Manila University, lakip na ang presidente niini nga si Father Bobby Yap, ug si Father Nemesio “Nemi” Que.
Sa imbestigasyon, gitan-aw usab sa mga otoridad ang posible nga papel sa pipila ka organisasyon ug kompanya sa pagdumala ug pagsuporta sa basketball program sa eskwelahan.
Klaro usab matud pa nga gisalikway sa MVP Sports Foundation ang pag-angkon nga sila adunay direktang pagpanag-iya sa Ateneo Men’s Basketball Team, ug gipasabut nga pagpondo lang sa koponan ang ilang gihatag.
Sumala sa PNP-CIDG, anaa na sa katapusang hugna ang ilang imbestigasyon ug pipila na lang ka pamahayag gikan sa mga kanhi magdudula ug pipila ka opisyal sa kadumalahan ang gihuwat.
