BUTUAN CITY – Padayon pang gi-imbestigahan sa ginsakpan sa Butuan City Police Station 1 ang natigayong pagpamusil kaganinang alas-2:30 sa hapon sa may Purok 4, Brgy. Villa Kananga ning siyudad sa Butuan.
Ang maong insidente miresulta sa pagkamatay sa ulitawong biktimang si Mark Gil Bacor, manager sa usa ka auto trading company ug usa ka kanhi seminarian ug residente sa Purok 4, Camella Homes sa susamang barangay.
Sigon ni PCaptain Anne Cubio, tigpamaba sa Butuan City Police Office kon BCPO, kalit lang matud pang misulod ang wala pa mailang responsible sa compound nga gitrabahuan sa biktima ug gipusil kini sa makadaghang higayon.
Gidala gilayon kini sa pribadong ospital apan nakabsan gihapon sa iyang kinabuhi samtang ang narekober nga mga bala, gipa-ilalom gilayon sa ballistic examination aron masuta ang kalibre sa armas nga gigamit.
