BUTUAN CITY – Mag-atubang og kasong reckless imprudence resulting to multiple homicide ang driver sa gi-impound trailer truck human nakabangga ang kasugat nga motorsiklo ning mi-aging gabii sa may Km. 15, Purok 1, Brgy. Mabuhay, Sison, Surigao del Norte.
Naila ang mga biktimang sila John Mark Caliwan, 28-anyos, contact tracer ingon man ang backrider nga si Jemart Escabal, staff sa Sangguniang Kabataan kon SK Provincial Federation, parehong lumulupyo sa Brgy. Cawilan lungsod sa Taganaan ug ang hinigugma niining si Jenny Mapinhag, 25-anyos, dalaga nga taga-Brgy. Macalaya, lungsod sa Placer sa susamang lalawigan.
Base sa imbestigasyon sa Sison Municipal Police Station, ang mga biktimang gikan sa fraternity party sa Cagbantoy Beach, ug misakay sa usa kolor itom nga Honda XRM motorcycle paingon unta sa Surigao City ug dihang mi-overtake kini sa laing motorsiklo ug dinhi ilang nakasugat ang Hino Trailer Truck nga gimanehuan ni Peter Aniscal Cahulogan, 46-anyos nga taga-Taganaan rason sa head-on-collision.
Gani gisulayan pa og brake sa driver sa iyang sakyanan apan tungod sa kakusog sa dagan sa motorsiklo misangpot kini sa maong insidente.
