BUTUAN CITY – Gikan sa 32 misaka pa sa 57 ang total confirmed COVID-19 cases sa Caraga Region human gitaho sa DOH Center for Health Development – Caraga ang nadugang nga 25 nga bag-ong kaso sa maong virus.
Sa gipahigayong online press briefing kagabie, gikumpirma ni Dr. Jose Llacuna, Jr., regional director sa DOH-Caraga nga sa 25 ka mga bag-ong kaso, 16 niini ang gikan sa Butuan City, 2 sa Buenavista, Agusan del Norte, 2 sa Prosperidad, Agusan del Sur, 2 sa Bislig City sa Surigao del Sur ug tag- usa sa lalawigan sa Surigao del Sur, lungsod sa San Francisco, Agusan del Sur ug Lingig, Surigao del Sur samtang usa ka imported case usab gikan sa Zamboanga del Sur.
Gilangkuban ang mga bag-ong kaso sa mga Returning Overseas Filipino Workers (ROFs) , Local Stranded Individuals (LSIs) , usa ka health worker ug usa ka transient nga gikan Zamboanga del Sur kinsa pulos asymptomatic kon walay gibating simtomas gawas lamang sa usa nga dunay mild symptoms.
Gikumpirma usab sa opisyal nga natala na ang local transmission sa Butuan City sanglit tulo sa mga nagpositibo walay travel history sa mga lugar nga adunay kaso ug wala usab ma-expose sa COVID-19 patient.
Sa kasamtangan maubot na sa 43 ang cumulative probable cases kondiin 12 ang nagpabiling admitted ug laing 12 ang naka-strict home facility quarantine samtang nagpabilin usab sa 163 ka cumulative suspect cases ang natala sa rehiyon.
Nanawagan ang buhatan ngadto sa mga Caraganons nga mukuoporar pinaagi sa pagtamod sa minimum health protocols sama sa pagsuot og face mask, kanunay nga paghugas og kamot hantod sa pagpalig-on sa panglawas aron mapugngan ang pagkaylap pa sa maong coronavirus.
