BUTUAN CITY – Nagpatabang sa Bombo Radyo Butuan ang usa ka senior citizen aron lang ma-operahan sa ingon matangtang na ang tumor nga anaa sa iyang kidney apan nagprobema sa wala paghatag kanya og certificate human niya natapos ang gi-require nga 14-day quarantine dihang nagpositibo kini sa COVID-19 sa rapid test.
Sa pakighinabi sa ning sibyahan, gisaysay ni Bernabe Moreno nga una siyang gi-admit sa M.J Santos Hospital bahin sa maong sakit sa kidney ug gitambagan nga kinahanglang ma-operahan sa labing daling panahon apan aron makaminos sa gastos, gipa-refer siya sa Provincial Hospital subay na usab sa tambag kaniya sa ilang doktor.
Sa pag-abot ni Bernabe sa maong ospital mipailalom siya rapid test isip pagtamod sa health protocol ug migawas nga positibo siya sa COVID-19 rason nga sya nag-home quarantine sugod adtong Hulyo 28 butang nga girespeto usab ni Bernabe taliwa nga nanginahanglan kini og hinaling operasyon.
Ang gika-aligut-gotan niini tungod kay human na ang iyang quarantine period apan wala pa siya isyuhi og certificate gikan matud pa sa Department of Health kon DOH-Caraga ng natapos na ang iyang kwrantina aron mapa-ilalom gilayon siya sa operasyon.
Dihang wala na siya’y nahuna-hunaang madangpan human miduol sa ilang barangay officials ug wala’y nahimong aksyon, nagpatabang na siya sa Bombo Radyo Butuan aron mapa-ilalom na siya sa operasyon.
Gitawagan na ning sibyahan kagabii ang mga opisyal sa DOH-Caraga apan wala’y mutubag sa gi-initiate nga mga tawag.
