BUTUAN CITY – Laing batch sa mga na-hire nga contact tracers alang ning siyudad sa Butuan ang gipa-ilalom sa orientation sa Butuan City Interior and Local Government kon Butuan-CILG human ang unang batch kagahapon.
Sama sa attendance kagahapon, ubay-ubay nga mga lingkuranan ang nabakante sa wala pa masutang rason.
Sa eksklusibong pakighinabi sa Bombo Radyo Butuan, gibutyag ni Butuan CILG Director Charissa Guerta, nga gawas sa 18-mil pesos nga binulang suhulan sa matag-contact tracer, duna pa‘y ilang communication allowance ug isyuhan usab sila og Personal Protective Equipment kon PPE isip ilang proteksyon batuk sa makamatay nga coronavirus.
Sigon sa opisyal, base sa ilang nadawat nga mandatus gikan sa ilang mga opisyal, tulo ka buwan lang ang kontrata sa maong mga contact tracers rason nga gikan sa Oktubre hangtud Disyembre lang ang ilang pagpanarbaho pagsuhid sa mga tawong duna’y close contact sa mga COVID-19 positives.
