BUTUAN CITY – Planong dungan nga pa-atubangon ni Senate President Pro Tempore at Blue Ribbon Committee Chairperson Panfilo “Ping” Lacson sila kanhe Speaker Martin Romualdez, kanhe Ako Bicol Party-list Representative ug pugante nga si Zaldy Co, ug ang 18 ka indibidwal nga nagpailang kanhe mga sundalo, sa pagdungog sa Blue Ribbon Committee mahitungod sa matud pa anomalya sa flood control projects.
Sigon ni Lacson, padayong imbitahan sa komite si Romualdez hangtud nga dunay mga impormasyong nakutay sa iya ug kinahanglan ang iyang partisipasyon.
Dugang pa niini, mahinungdanong dungan nga mag-atubang sila Romualdez, Co ug ang 18 ka kanhe sundalo bisan si Orly Guteza sa pagdungog sa senado aron madungog ang mga salaysay sa mga niini ug matumbok kung kinsa sa ila ang nagsulti og tinood.
Mahinumduman nga si Co ang gitumbok nga dunay dakong partisipasyon sa kahiwian nga naglambigit usab kang Romualdez nga siya matud pa ang mastermind sa mga anomalya sa proyektong flood control sa gobyerno butang nga nagkonekta sa mga salaysay sa 18 ka kanhe sundalo nga matud pa nag-deliver sa minaletang kwareta sa balay ni Romualdez sa sugo ni Co.
Samtang gibutyag usab ni Lacson nga giandam na niya ang usa ka Chairmans Progress Report mahitungod sa flood control scandal para maghatag og dalan sa subling pagdungog sa komite ug makatabang sa pagmugna og mga kaso sa Department of Justice (DOJ) ug Office of the Ombudsman batuk sa mga nalambigit.
Ipakita sa progress report ang mga nadiskubrihan sa partial committee report, lakip ang mga ebidensyang nakuha sa pagdungog isip attachments para makatabang sa gihimong imbestigasyon sa mga ahensya.
Samtang gibutyag usab sa senador nga abli pa gihapon siya sa posibilidad nga dunay mopirma pang mga parehong senador sa partial commmittee report aron hingpit na kining mahisgutan sa plenaryo diin mamahimo kining hisgutan, amyendahan, ug palig-onon.
Sa katapusan, gitumbok ni Lacson nga sundan sa Blue Ribbon panel ang ebidensya bisan pa og mosangpot usab kini bisan sa Pangulo.
Apan gitin-aw sa senador nga sa karun wala pay importansiya ang mga pamahayag ni Co batuk sa Presidente sa matud pa kickback sa mga proyekto tungod kay dili kini gihimo ilalom sa pagpanumpa.
