BUTUAN CITY- Gipadayag ni Danilo “Ka Daning” Ramos, presidente sa Kilusang Magbubukid ng Pilipinas kon KMP, nga kinahanglan imbestigahan ug patubagon si Vice President Sara Duterte kalabot sa kontrobersyal nga P612.5 milyon nga pondo, kansa giingon niining dako kaayong kantidad alang sa mga mag-uuma nga dugay nang nangayo og produksiyon nga subsidy gikan sa gobyerno.
Sigon pa ni Ramos, kasagarang mangutang ang mga mag-uuma og P50,000 hangtod P60,000 alang sa araro, binhi, abono, pestisidyo ug uban pang panginahanglan sa pagpanguma.
Matud usab niini, nga kon ang P612.5 milyon igahin sa subsidy production nga P50,000 matag benepisyaryo, daghang mag-uuma, agricultural workers, farm workers ug fisherfolk ang mahimong matabangan.
Gipasaka usab ni Ramos ang isyu sa giingong dili klarong mga kabtangan ug ang P6.7 bilyon nga questionable bank transactions, samtang iyang gipasiugda nga dako ang panginahanglan sa mga Pilipino sa pagkaon, ilabina sa bugas, tungod sa gidaghanon sa mga katawhan nga nag-antos sa kagutom ug kalisod.
