BUTUAN CITY – Siento-porsiento nang gibalik sa Department of Education kon DepEd-Caraga karong adlawa ang klase sa tanang mga pampublikong tunghaan sa elementarya ug sekondarya ning rehiyon human ang taas-taas nga holiday break.
Sa eksklusibong pakighinabi sa Bombo Radyo Butuan, gipadayag ni DepEd-Caraga spokesperson Pedro Tecson nga sa kadaghan sa mga tunghaan nga gihimong evacuation centers atol sa mga pagbaha niadtong Christmas season, bugtong usa na lang ka lawak-tunghaan sa elementarya sa lungsod sa Maninit, Surigao del Norte ang duna pa’y mga namakwit.
Apan giklaro niini nga bisan og balik na sa klase ang tanang tunghaan ning rehiyon, mag-agad pa gihapon sa advisory sa Philippine Atmospheric Geophysical and Astronomical Services Administration kon PAGASA ingon man sa mga local government units, kung magdeklara una sila og kanselasyon sa klase ilabina kung duna’y mga hulga sa pagbaha hangtud nga mumaayo na ang dagan sa panahon.
