BUTUAN CITY – Kampante si Department of Public Works and Highways kon DPWH Sec Vince Dizon sa gibug-aton sa ilang mga ebidensya ilang gikuptan batuk sa presidential cousin nga si Leyte Congressman Martin Ferdinand Romualdez.
Dihang gipangutana kung nganong wala pa’y kasong gipasaka batuk sa kongresista taliwa nga pila ka higayon nang gilitok ang iyang pangalan sa mga anumalusong flood control projects, gipadayag sa kalihim nga naglihok ang legal process sa kongresista.
Sigurado siyang sa labing dali nga panahon, maduso na ngadto sa korte ug sa Sandiganbayan ang mga kaso. Iyang gibutyag nga siya mismo ang nagtigom sa mg ebidensya ug nag-refer niini ngadto sa Office of the Ombudsman niadto pang Nobyembre 30 ning mi-aging tuig.
Gani ang maong mga ebidensya matud pa ang nahimong yawe sa pagpagawas og freeze order ang korte sa mga kabtangan sa kanhi house speaker ug hingpit pang gidid-an nga mugawas sa nasud.
Dugang pa sa kalihim nga bisan og daghan ang gustong makakitang kasuhan o kaha mabilanggo na ang nasangpit nga kongresista, kinahanglan gihapong ipaagi sa saktong proseso ang pagpasaka og kaso sama sa mga kasong gipasaka batuk nila Senador Jinggoy Estrada, ug uban pang nabilanggo karon tungod sa anumalusong mga flood control projects.
