BUTUAN CITY – Miabot sa kapin 91-mil ka residente ang apektado sa ashfall gikan sa Mayon Volcano, samtang padayon ang clearing operations dungan ang mga taho sa pagkamatay sa mga binuhing hayop sa pipila ka lugar.
Sigon ni Guinobatan Mayor Ann Gemma Ongjoco, muabot sa 26,654 pamilya o 91,225 indibidwal sa lalawigan ang naapektuhan sa pag-ulan og abo samtang miabot usab sa 41 ka barangay ang natabunan sa baga nga abo nga naghatag og dakong kahasol sa pang-adlaw-adlaw nga buluhaton sa mga residente.
Tulo ka barangay lang ang wala kaayu naapektuhan bisan og walay gipatuman nga pugsanong paghikling.
Sa mga nag-unang kalsada, halos zero visibility ang nasinatian tungod sa baga nga abo, rasong nag-deploy og mga fire truck gikan sa nagkadaiyang lungsod aron gelayong pagpanglimpiyo.
Naghatag usab kini og peligro sa mga motorista ug temporaryong pagkalangay sa dagan sa trapiko.
Tungod kay gibalhin ang paggamit og tubig sa road clearing operations, nakabaton usab og temporaryong pagkawala sa suplay sa tubig sa pipila ka luga rasong napugos nga mogamit ang mga residente sa mga hydrant.
Samtang gibutyag usab ni Assistant Secretary Bernardo Rafaelito Alejandro IV sa Office of Civil Defense nga naggahin na og fuel assistance ang gobyerno aron mapadali ang paglimpiyo sa mga kalsada.
Dugang pa niini nagpabiling passable ang mga nag-unang dalan ug wala pay natalang lapad nga damyos sa imprastraktura.
Dako usab ang damyos sa sektor sa agrikultura diin natabunan sa abo ang mga kahumayan nga hapit nang anihon.
Sa lungsod sa Camalig, gitaho usab ni Mayor Carlos Irwin Baldo ang pagkamatay sa pipila ka mga binuhing hayop tungod sa ashfall, apan padayon pa ang beripikasyon sa eksaktong ihap.
Sigon ni Doreen Abelinde, officer-in-charge sa Mayon Observatory, ang ashfall mao ang hatud sa sunod-sunod nga aktibidad sa bulkan lakip na ang strombolian eruptions, pyroclastic density currents, pagdahili sa lava dome, ug lava fountaining.
Miabot matud pa sa 3,000 metro ang kataas sa ash plume.
Nagpabilin sa Alert Level 3 ang Mayon Volcano, nga nagpasabot nga dunay posibilidad sa dugang pagbusikad rasong padayon ang pahinumdum sa mga awtoridad sa publiko nga magpabiling alerto ug musunod sa mga safety protocol.
