BUTUAN CITY – Kapin sa 6,300 ka pulis ang ipakatag sa palibot sa Senado karung adlawa, Hulyo 6, 2026, isip seguridad dungan sa pagsugod sa impeachment trial ni Vice President Sara Duterte.
Sigon ni Philippine National Police-National Capital Region Police Office (PNP-NCRPO) spokesperson Police Major Hazel Asilo, kadaghanan sa mga gilaumang panagtapok anaa sa atubangan sa Senado.
Nasayran nga dunay usa ka grupo nga nagplanong mohimo og pag-martsa padulong sa Senado gikan sa kasikbit nga lugar, rasong magdugang pa og mga ginsakpan sa kapulisan.
Bisan og wala pay naaprubahang permit para sa bisan unsang rally, namahayag si Asilo nga abli gihapon ang PNP-NCRPO sa mga pundok nga gustong magpahigayon og protesta basta sundon lang ang saktong proseso.
Gawas niini, magpatuman usab og maximum tolerance ang kapulisan kon pananglitan mosulay og paduol ang mga raliyista sa atubangan sa Senado.
Unahon matod pa ang dayalogo ug negosasyon pinaagi sa mga tinudlong negotiation teams, samtang nakaandam usab ang mga public order units kon gikinahanglan.
Wala pa matino sa kapulisan ang gilaomang gidaghanon sa mga mosalmot sa mga lihok-protesta, apan naseguro niini nga andam silang motubag sa bisan unsang sitwasyon nga may kalabotan sa seguridad.
Kahinumdoman nga na-impeach si VP Sara sa House of Representatives niadtong Mayo tungod sa mga alegasyon sa culpable violation of the Constitution, graft and corruption, bribery, betrayal of public trust, ug uban pang bug-at nga krimen.
Niadtong Hulyo 1, nagpasaka usab ang kampo ni Sara Duterte sa ilang tubag sa Articles of Impeachment ug nihangyo sa impeachment court nga ibasura ang kaso.
Gikatakdang magsugod ang impeachment trial unyang alas-2 sa hapon.
Himoon una ang mga pagdungog matag Lunes hangtod Miyerkules hangtod sa ikalimanang State of the Nation Address (SONA) ni Pangulong Ferdinand Marcos Jr. sa Hulyo 27.
Human sa SONA, ibalhin ang mga pagdungog matag Martes hangtod Huwebes sa alas-2 sa hapon.
Samtang, temporaryong sirad-an sa kagamhanang lokal sa Pasay ang bahin sa Diokno Boulevard dapit sa Senado samtang gipahigayon ang pagtaral.
Apil sa sirad–an ang northbound ug southbound lanes gikan sa Seaside Boulevard hangtod sa Atang dela Rama Street, lakip na ang mga interseksyon sa maong dapit.
Ipatuman ang traffic scheme sugod Hulyo 6, matag Lunes, Martes ug Miyerkules, gikan alas-7 sa buntag hangtod alas-7 sa gabii.
Sa pikas bahin, gipahigayon usab ang mas gipahugtan nga seguridad sa Sandiganbayan ug Office of the Ombudsman human sa pagpasaka og kasong plunder batok kang Senator Rodante Marcoleta.
