BUTUAN CITY – Nakig-alayon na si Tandang Sora, Butuan City Brgy. Captain Hiniginio Castañares kang Limaha Brgy. Captain John Rosales alang sa planong joint soft lockdown nga ilang ipatuman.
Kini human nagpositibo sa COVID-19 ang usa sa ilang mga residente nga nakarehistro sa Brgy. Tandang Sora apan nagpuyo karon sa Brgy. Limaha.
Sa eksklusibong pakighinabi sa Bombo Radyo Butuan, gipadayag ni Kapitan Castañares nga partikular nilang i-lockdown ang South T. Calo Extension sa Brgy. Limaha ug ang Purok 5 ug 7 sa Brgy. Tandang Sora kon eskina sa Zacor ug Old Zamora Road, Ochua, Charitoville 2 ug sa gi-ablihan nilang kalsada aron masulod sa 500-meter radius rason nga ang musulod sa ilang barangay anha na mu-agi sa Zacor main road.
Gimanduan na niya ang ilang barangay nurse nga makig-alayon usab sa nurse sa Brgy. Limaha alang sa pag-lockdown.
Gawas sa nagpositibo nga anaa sa Purok 7, Tandang Sora kansa utlanan sa Limaha, duna pa’y laing duha niya ka mga constituents nga ipa-ilalom pa sa swab test aron makumpirma kung nataptan ba sila og coronavirus.
Tungod niini, mag-isyu na sila og entry ug exit pass sa ilang mga residenteng manggawas agi sa ilang imontar nga mga barangay quarantine post.
Aron makakuha og entry ug exit pass, kinahanglang i-update una sa mga residente ang ilang gihuptang quarantine pass.
