BUTUAN CITY- Nagpasidaan ang Israel nga palawmon niini ang operasyon sa Gaza kung dili mohunong ang mga paglansad og kite, drone ug balloon padulong sa teritoryo sa Israel, human misaka ang mga insidente sa miaging mga adlaw.
Sumala sa Israeli officials, 10 ka kite ang nakit-an sa mga komunidad duol sa utlanan sa Gaza, lakip ang usa nga gipusil sa Israeli military, ug gituohang posibleng adunay kalabotan sa Hamas, apan gilimod sa grupo ang maong alegasyon.
Gipahimangnoan usab nila Prime Minister Benjamin Netanyahu ug Defense Minister Israel Katz ang Hamas nga palig-onon sa Israel ang targeted operations batok sa mga responsable ug posibleng pahawaon ang mga residente gikan sa mga lugar diin gilansad ang maong mga butang.
Samtang, sigon sa Hamas nga ang mga kite gilansad sa mga bata nga nangita og higayon nga makasinati og normal nga pagkabata taliwala sa kaguba sa Gaza, ug giakusahan ang Israel nga gigamit kini isip pasangil sa mga airstrike.
Sa maong pag-atake sa sentral nga Gaza niadtong Domingo, tulo ka tawo ang gikatahong namatay, sumala sa Gaza Civil Defence rescue service.
