BUTUAN CITY- Nagbinaslanay ang Estados Unidos ug Canada human mapakyas ang ilang trade talks, nga misangpot sa pagpatuman sa bag-ong 50 prosyento nga taripa sa US sa pipila ka produkto gikan sa Canada.
Sumala ni US President Donald Trump, gusto matud pa sa Canada nga makabenepisyo sa mga pribilehiyo sa usa ka estado sa US bisan dili kini mahimong estado, samtang sigon ni Canadian Prime Minister Mark Carney nga sayop ang desisyon sa Washington ug gitumong lamang aron pasakitan ug bahinon ang Canada.
Gipahibalo usab ni Carney nga motubag ang Canada og susama nga taripa sa mga produkto sa Amerika sugod Setyembre 8, lakip ang steel, dairy products, appliances ug electronics, samtang gitawag niya ang sitwasyon nga usa na ka trade war.
Ang bag-ong US tariffs mokobre sa mga produkto nga nagkantidad og mokabat sa 20 bilyon dolyar, lakip ang wine, dairy, semento, sinina ug hockey equipment, samtang nagpadayon ang mga daan nang taripa sa steel, aluminum, sakyanan ug lumber.
Gisuportahan usab sa pipila ka lider sa Canada ang retaliatory measures ni Carney, samtang nagpasidaan ang ubang opisyal nga posibleng mawad-an og trabaho tungod sa epekto sa gubot sa pamatigayon.
