BUTUAN CITY- Mibiya na paingon sa Iran ang mga nag-unang negotiator sa nasod human sa 18 ka oras nga pakigpulong sa Switzerland, samtang nagpabilin ang pipila ka miyembro sa delegasyon aron ipadayon ang teknikal nga negosasyon kabahin sa Islamabad memorandum of understanding.
Sumala sa mga Mediators sa Pakistan ug Qatar, nakab-ot sa United States ug Iran ang “makapadasig nga kalamboan” sa unang adlaw sa taas nga lebel nga mga panaghisgot ug nagkauyon sa usa ka roadmap alang sa pinal nga kasabutan nga gilauman mahuman sulod sa 60 ka adlaw. Sa sayo pa, si Donald Trump mipahimangno nga mahimong atakehon sa US ang Iran tungod sa suporta niini sa Hezbollah, samtang si Mohammad Bagher Ghalibaf nag-awhag sa Washington nga magbantay sa mga pahayag niini.
Sa laing bahin, sigon ni Israel Katz nga magpabilin ang pwersa sa Israel sa habagatang Lebanon kutob sa gikinahanglan, samtang nanumpa ang Hezbollah nga moatubang sa bisan unsang paglapas sa kasamtangang kasabutan sa hunong-buto.
