BUTUAN CITY – Padayon pang gisuta sa kapulisan kung duna ba’y foul play o wala ang pagkasunog sa usa ka taksi pasado alas-onse kagabii daplin sa dalan sa Purok 16, Brgy. Mahay ning siyudad sa Butuan nga miresulta sa pagkamatay sa driver niining si Julius Azura, residente sa Brgy. San Vicente ning siyudad sa Butuan.
Sa eksklusibong pakighinabi sa Bombo Radyo Butuan, gibutyag ni PMajor Emerson Alipit, tigpamaba sa Butuan City Police Office, nga apil sa ilang gisusi kung duna ba’y pinusilan ang biktima human nakadungog og buto ang mga residente sa maong dapit kansa posible usab nga gikan mga ligid niini.
Bisan og dili totally burnt ang sakyanan apan dili na kini magamit tungod kay sunog na ang makina niini ug mga parte sa sulod nga bahin.
Dili usab makonsiderang tulis ang motibo kung duna may indibidwal nga mituyo pagsunog sa taksi tungod kay wala man mawala ang iyang pitaka ug tablet.
Gihulat na lang nila ang investigation report gikan sa Scene of the Crime Operatives kon SOCO-Butuan ug sa Bureau of Fire Protection kon BFP-Butuan aron matin-awan kalabot sa maong insidente.
Samtang sigon sa residente sa maong dapit nga si Gene Tecson, paggawas niya sa ilang balay, nakita na lang niya nga nasunog na ang mga ligid sa sakyanan ug nagbuto-buto na.
