BUTUAN CITY – Hustisya ang singgit sa pamilya Nuñez human gitu-uhang biktima sa ngilngig nga kremin ang 9-anyos nga batang babayeng napalgang wala na’y kinabuhi human ang kapin usa ka semanang pagka-missing niini.
Nasayrang kagahapon sa ala-una sa hapon dihang napalgan ang special child nga si Jenelyn Nuñez, residente sa Sitio Tagbabacon, Brgy. Culit, Nasipit, Agusan del Norte sa creek nga bahin sa Sitio Binuntulan sakop na sa Brgy. Jaguimitan sa susamang lungsod.
Sa eksklusibong pakighinabi sa Bombo Radyo Butuan, nakapangutana ang apuhan sa biktimang si Edgardo Nuñez kung unsa’y sala sa iyang apo nga gihimuan og ingon niadto.
Dako ang iyang pagtuo nga gibinu-angan ang iyang apo tungod sa kalayo sa na-abtan sa patay’ng lawas niini nga duna pa’y samad sa li-og, wala na’y suot nga pangtaas ug labaw pa sa tanan, maglisod kini og lakaw.
Nasayrang sukad nga wala na maka-uli sa balay sa iyang lola sa sentrong bahin sa maong sitio ang biktimang si Jenelyn sukad niadtong mi-aging Miyerkules, Marso 3, wala’y hunong ang search and rescue operation sa mga barangay tanod, mga volunteers ug mga pulis hangtud nga napalgan na kining wala na’y kinabuhi.
