BUTUAN CITY – Daw susama sa semi-anarchy ang porma sa paggamhanan karon sa Haiti tungod sa nagpadayong gang war.
Sa eksklusibong pakighinabi sa Bombo Radyo Butuan, gibutyag ni Bombo international correspondent Fr. Adrian Louie Zambo Atonducan nga na-assign siya sa capital Port-Au-Prince ug bisan sa kakulba nga ilang bation tungod sa kagubot, wala sila’y mahimo kondili mag-ampo lang ilabina nga dili na stable ang ilang gobyerno tungod sa pag-resign sa ilang primero ministro.
Sa 11 ka tuig na matud pa niya sa maong nasud, karon lang siya nakasinati og grabe nga kagubot tungod sa wala pag-function sa ilang gobyerno gawas lang sa mga pulis nga anaa sa mga kalsada rason nga dili stable ang sitwasyon karon sa maong nasud.
Aminado ang Sugbu-anon nga pari nga mabutang sa alanganin ang ilang seguridad ilabina nga ning mi-aging adlaw lang, gi-atake sa mga gangs ang balay sa obispo nga miresulta sa pagka-angol niini.
Ang maong pag-atake mugna matud pa sa ilang baruganan nga nagsaway sa mga gangs nga naghatag og kagubot rason nga ila nang gitugyan sa Kahitas-an ang ilang kaluwasan.
Hinuon sa pagkakaron, gibutyag ni Fr. Atonducan nga luwas sila sa ilang nahimutangan tungod kay medyo layo pa man sila gikan sa sentrong bahin sa Port-au-Prince.
