BUTUAN CITY – Naka-abot na sa kauluhang Manila ang ginikanan ni Rene Clert “Bobet” Baterbonia aron mu-atubang sa Criminal Investigation and Detection Group (CIDG) ugmang adlawa kondiin personal silang mutubag sa imbestigasyon kalabot sa kaso sa ilang anak nga namatay atol sa gika-ingong team-building activity sa Dipaculao, Aurora.
Ang pag-abot sa ginikanan ni anhing Rene, nagpakita nga andam sila nga mo-cooperate sa mga otoridad ug muhatag og klaro nga pamahayag.
Madumdumang nakakuha na ang PNP-CIDG og sworn statement gikan sa inahan ni Bobet nga si Rovelyn Baterbonia, niadtong Hunyo 25, didto mismo sa Talacogon, Agusan del Sur subay na sa nagpadayong imbestigasyon kansa nagtan-aw sa posibilidad nga adunay criminal negligence nga nakomitar ang mga nagdala kang Rene ug iyang mga ka-ubanan, ilabina ang paglapas sa Anti-Hazing Act, kondiin 11 ka mga tawo ang posibleng makasuhan.
Madumduman usab nga atol sa lubong ni Bobet sa wala pa gisira ang iyang lungon, gipataban ni Rovelyn ang jersey ni Bobet nga duna’y pangalan sa mga coaches ug coaching staff sa Ateneo Blue Eagles dungan sa iyang hangyo sa patay’ng lawas nga dili sila patulgon hangtud nga dili mugawas ang hustisya alang sa iyang kamatayon.
