BUTUAN CITY – Padayon pa ang gihimong assessment sa mga opisyal sa Brgy. Limaha ning siyudad uban sa mga hingtungdang ahensya sa kagamhanan aron masuta ang saktong ihap sa mga balay nga gilamoy sa kalayo sa may Purok 7 kaganina adiser mag-udto ug ang ihap sa mga na-apektuhang pamilya ug indidbidwal.
Sa eksklusibong pakighinabi sa Bombo Radyo Butuan, gipadayag ni Limaha Brgy. Kapitan Jhon Rosales, nasuta sa inisyal niyang pakisusi, gibana-banang 50 ka mga balay ang nalamoy sa kalayo ug gisuta pa nila ang kinatibuk-ang ihap sa mga apektadong pamilya tungod kay duna’y usa ka bubong nga duna’y tulo ka pamilya ang nagpuyo.
Naggikan matud pa sa ikaduhang andana sa panimalay ni Luzviminda Senados ang kalayo kansa paspas nga mikaylap tungod kay gama man sa mga light materials ang kadaghanan niini.
Nanawagan siya og hinabang aron matunol nila ngadto sa mga nasunugan ilabina nga kadaghanan kanila, tapot lawas ra ug wala gyoy nadala nga mga gamit.
Samtang sigon usab sa residente, wala siya makabantay sa pagsugod gayod pag-ulbo sa kalayo tungod kay naglung-ag siya ug dihang nabantayan na niyang mukusog na ang kalayo, dali niyang gikuha ang iyang anak.
Apil matud pa sa nasunog ang balay sa iyang iyaan, ig-agaw ug igsoon tungod kay sikit-sikit man ang mga niini. Wala matud pa nila makaya pagtabang ang paglaong sa kalayo tungod sa kapaspas sa pagkanat niini.
