BUTUAN CITY – Wala usab magpa-ulahi ang Philippine Postal Corporation kon PhilPost- Butuan paghatag og Valentine offer ngadto sa katawhang gustong ipadayag ang ilang gugma ngadto sa iyang mga gihigugma.
Kini pinaagi sa subling paglusad nila sa tinuig na nilang ‘Epress Pada-Love’ kondiin mahimong makapili og ipadalang Valentine’s presents ang mga tawo padulong ngadto sa ilang mga hinigugma.
Sa eksklusibong pakighinabi sa Bombo Radyo Butuan, gipadayag ni PhilPost-Butuan acting post master Glenda Mahinay nga apil sa mahimong mapadala sa ilang mga kliyente ang mga buwak, chocolates ug uban pa nga maghatag og kalipay sa mga tawong ilang gihigugma.
Dugang ni Mahinay, pwede gihapon kung ang ilang kliyente ang mupalit og gift items gawas unya sa ila lang ipadala ang bayad.
Gawas niini, duna usab sila’y harana nga andam mukanta alang niadtong gustong kantahan ang ilang mga mahal sa kinabuhi.
Sulod lang sa dakbayan sa Butuan ang ilang delivery aron masigurong dili pa malawos ang buwak nga ilang ipadala.
