BUTUAN CITY – Wala na’y curfew hour nga ipatuman ang lokal nga kagamhanan ug kapulisan ning siyudad sa Butuan base sa Executive Order No. 5 nga gipagawas sa buhatan ni Mayor Ronnie Vicente Lagnada human gipa-ilalom ang siyudad sa alert level 2 sugod kagahapong adlawa hangtud sa Pebrero 28.
Sa esksklusibong pakighinabi sa Bombo Radyo Butuan, gipadayag ni Butuan City local government spokesperson Michiko de Jesus nga nadugang sa maong kamanduan ang pagtangtang na sa online application sa SPass niadtong gikan sa gawas nga bahin sa Caraga Region apan kinahanglang ipakita ang ilang vaccination card o kaha vaccination certificate ug gustong musulod sa Butuan.
Giwala na usab ang pagpa-swab test sa mga manulod sa Butuan gikan sa gawas sa Caraga lima ka adlaw gikan sa ilang pag-abot.
Lu-ag na usab ang transportasyon samtang kinahanglang ipakita ang vaccination card kung musulod sa mga business establishments higayong duna’y paliton o kaha gustong mu-avail og serbisyo.
Giklaro usab ni de Jesus nga kadto lang mga bakunado ang makagawas aron mupalit sa panginahanglanon sa ilang pamilya ug ang mga dili bakunado, magpabilin lang sa panimalay.
