BUTUAN CITY – Giklaro sa World Health Organization kon WHO nga ang hantavirus outbreak sa usa ka cruise ship, dili mao ang pagsugod sa usa ka pandemya.
Sigon ni Maria van Kerkhove, usa ka infectious disease epidemiologist sa WHO, dili kini parehas sa pagkaylap sa COVID-19, unom ka tuig na ang milabay tungod kay ang hantavirus mokatap pinaagi sa duol ug suod nga kontak.
Kamulo karon ang mga health experts pagsubay sa daghang tawo nga bag-o lang nanaog gikan sa Dutch vessel nga MV Hondius. Sigon sa WHO, sa kinatibuk-an, lima sa walo ka gituohang kaso sa hantavirus ang nakumpirma na kondiin tulo ang namatay, lakip ang usa ka 69 anyos nga Dutch nga babaye nga adunay virus, apil na ang ilyang bana ug usa usab ka German nga babaye kondiin ang ilang mga kaso, padayon pang gi-imbestigahan.
Sumala sa WHO, kasagaran ang hantavirus mokatap gikan sa mga ilaga apan sa pinakabag-ong outbreak, sa unang higayon nakumpirma ang pagtakod gikan sa tawo ngadto sa tawo.
Nasayrang ang luxury cruise nga gipadagan sa Oceanwide Expeditions nagsugod sa biyahe niadtong Abril 1 sa Ushuaia sa Argentina, ug gila-uman nga moabot sa Canary Islands sa Spain karong Mayo 10.
Mga 150 ka mga pasahero ug tripulante gikan sa 28 ka nasod maoy unang sakay sa barko, apan daghan kanila ang nanaog sa Saint Helena niadtong Abril 24.
