BUTUAN CITY – Posibleng mosulod sa Philippine Area of Responsibility (PAR) karung weekend ang Tropical Storm ”Hagupit” ug tawagon kining “Caloy” kung nakasulod na sa nasud, sigon sa Philippine Atmospheric Geophysical and Astronomical Services Administration (PAGASA).
Sa weather advisory ning buntag sa Biyernes, gibutyag sa state weather bureau nga ulahing nasigpatan ang sentro sa bagyo sa kalay-ong 1,615 kilometro sidlakan sa amihanang-sidlakang parte sa Mindanao.
Bitbit sa bagyo ang kusog sa hanging muabot sa 75 kilometros kada oras dool sa sentro og pagbuylo hangtud sa 90 kilometros matag oras samtang naglihok pakasadpan sa kapaspas nga 20 kilometros matag takna.
Sumala sa weather bureau, magpadayon ang paglihok sa ”Hagupit” pakasadpan sa sunod nga mga oras adiser molihis pa-kasadpan amihanang-kasadpan.
Laumanng makasulod kini sa PAR sa ugma ,Sabado sa gabi o hangtud buntag sa Domingo.
Posible usab nga mukusog ang ”Hagupit” ug mahimong usa ka high-end tropical storm sulod sa musunod nga 48 oras adiser subling mohinay ug mahimong tropical depression pag-abot sa Martes samtang anaa sa Philippine Sea.
Bisan paman gibutyag sa PAGASA nga gamay ang posibilidad nga direktang makaapekto ang bagyo sa kahimtang sa panahon ug kadagatan sa nasud sulod sa musunod tulo ka adlaw.
Samtang gibantayan usab sa weather bureau ang usa pa ka low pressure area (LPA) nga nasigpatan sa 120 kilometro habagatang-sidlakan sa Hinatuan, Surigao del Sur.
Bisan og gamay ang tsansang mahimong bagyo ang LPA, lauman kining magdala og mapanganuron nga kalangitan, kataga-katag nga pag-ulan, ug panalogdog sa Central Visayas, Eastern Visayas, Negros Island Region, Caraga, Northern Mindanao, Davao Region, ug Zamboanga Peninsula.
