BUTUAN CITY – Gi-andam na ang mga kasong ipasaka batuk sa lima ka mga gitu-uhang drug personalities nga nadakpan atol sa malampusong buy-bust operation pasado alas-6:30 kagabii sa Purok 5, Octagon, Brgy. Bading ning siyudad sa Butuan.
Miresulta kini sa pagbungkag sa mga sakop sa Philippine Drug Enforcement Agency kon PDEA-Agusan del Norte ug Agusan del Sur Provincial Offices sa usa ka drug den ug pagkasikop nila Erwin Lamparas; Roy Lamparas, Fidel Reyes, Domingo Ramos ug usa ka minor-de-edad.
Nakuha usab sa operating teams ang 9 ka buok heat-sealed transparent plastic sachets sa suspected shabu nga gibana-banang mitimbang og 15-gramos, usa ka genuine nga one thousand peso bill kansa may gigamit isip buy-bust money ug usa ka one thousand peso bill nga boodle money, 7 ka wala’y sulod nga sachets nga duna pa’y residue sa suspected shabu, pipila ka mga drug paraphernalia, usa ka yunit sa keypad cellular phone, ug usa ka yunit sa touchscreen cellular phone.
Apil sa mga kasong gi-andam nga ipasaka batuk kanila ngadto sa City Prosecutor’s Office ang paglapas sa sections 5 (Use of Dangerous Drugs), 6 (Maintaning Drug Den), 7 (Visiting Drug Den), 11 (Possession of Dangerous Drugs), ug 12 (Possession of Drug Paraphernalia), Article II sa RA 9165 kansa mas nailang “Comprehensive Dangerous Drugs Act of 2002.
Sa eksklusibong pakighinabi sa Bombo Radyo Butuan, gibutyag ni PDEA-Caraga information officer Dindo Abellanosa, ila nang gipa-drug test ang mga nadakpan samtang gipasusi na usab nila sa PNP Criem Laboratory ang nakuhang mga suspected shabu nga maoy ilang gamitong ebidensya sa ilang giduso na nga reklamo.
