BUTUAN CITY – Nakadawat na og 32 ka request for repatriation ang Department of Migrant Workers kon DMW-Caraga sukad nga dunay kagubot sa Middle East.
Sigon ni Regeinald Espaldon, Officer In Charge OIC- Assistant Regional Director sa maong ahensiya nga 24 oras na sila karung anaa sa opisina isip quick response team nga maoy mo-akomodar sa modangop nga pamilya sa mga OFW.
Gawas niini, gi-activate usab ang Caraga Region Re-integration Network nga gilangkuban sa 13 ka representante sa nagkadaiyang ahensiya sa gobyerno.
Gipaneguro sa maong programa ang hugot nga koordinasyon sa mga ahensiya aron matabangan ang mga OFW.
Subay niini, as of kagahapong adlawa, April 16 dunay 51 ka pamilya sa OFW ang midool sa buhatan diin 32 niini ang mi-request na og repatriation, nga nagsumikad sa Bahrain, Kuwait, Lebanon, Qatar, Saudi Arabia og United Arab Emirates.
Gibutyag usab sa opisyal nga nagpaabot usab og mga programa ang tagsa-tagsa ka national agencies alang sa mga OFW samtang duna nay psychological first aid nga ihatag sa manguli nga OFW.
