BUTUAN CITY – Gitahasan sa Department of Education (DepEd) ang tanang pampublikong tunghaan sa nasud nga mohimo og simple ug baratung graduation lakip na moving-up ceremonies para sa School Year 2025–2026, isip tubag sa mitaas nga gastus sa transportasyon ug presyo sa palaliton.
Sa ilalom sa DepEd Memorandum No. 015, series of 2026, gibawal ang bisan unsang koleksyon sa fees o kontribusyon gikan sa mga estudyante para sa end-of-school-year rites.
Sumala ni Education Secretary Sonny Angara, tumong niini nga mapagaan ang palas-onon sa mga pamilya.
Gimandu usab nga likayan ang mahal o gasto nga venues ug himoong inklusibo ang mga seremonya, samtang mamahimong gamiton ang school MOOE para sa gastoson.
Gibana-banang 1.9 milyong Grade 6 ug 1.8 milyong Grade 12 learners ang matapos karung tuiga ug nakatakda ang mga seremonya sa Marso 30 o 31, 2026.
